لقيت أسرة رايحة تصلي الفجر و سمعت الأب بيقول لبناته الصغيرين اللي يروح جري للمسجد اﻷول له جايزة ، بصراحة في اﻷول ابتسمت و عديت الموضوع عادي قولت يمكن لسة أول مرة يصلوا الفجر و كده بس اتصدمت لما لقيت الموضوع بيتكرر كل يوم بنفس التفاصيل ..
الأب بيعمل جايزة لبناته الصغيرين للي توصل المسجد اﻷول و البنات فرحانين جداً و بقوا هما اللي يطلبوا من باباهم إنه يعد ١ ٢ ٣ عشان يجروا للصلاة ..
بصراحة مش لاقية كلام يوصف جمال الموقف ، كون إنك تحبب طفلك من الصغر في الصلاة ده شئ جميل و هو هيدعيلك لما يكبر عشان عودته على الصلاة من و هو صغير ، طريقة تفكير الأب و بساطة فكرته تخلي أي أب او أم يستخدموا طرق زي ديه و يقدروا يحببوا أطفالهم في الصلاة بكل سهولة ..
و ده اللي المفروض تعمله كل أسرة ، حببوا أطفالكم في الصلاة و حفزوهم عليها و اعملولهم جوايز حتى لو كانت بسيطة ديه في حد ذاتها فكرة محفزة جداً لﻷطفال ، هي ديه الأسرة المسلمة على حق .
بعد الموقف ده أنا حبيت شارعنا جداً و بقيت بستني الاسرة ديه كل يوم عشان بس اسمع صوت ضحكة البنات و أشوف الفرحة في عين الأب و اﻷم مع كل مرة بيجروا فيها للمسجد
